TSSE Täzelikler

Bilşimiz ýaly, 2025-nji ýylyň 19-njy martynda Türkmenistanyň Söwda-senagat edarasynda  «Halkara parahatçylyk we ynanyşmak ýyly: durnukly ösüşi üpjün etmekde sebitara ykdysady hyzmatdaşlygyň orny» atly halkara maslahat geçirildi. Maslahata Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň gatnaşmagy möhüm  ähmiýetli waka hökmünde taryhyň sahypasyna ýazyldy. Milli Liderimiziň «Halkara parahatçylyk we ynanyşmak ýyly: durnukly ösüşi üpjün etmekde sebitara ykdysady hyzmatdaşlygyň orny»   atly halkara maslahatdaky çykyşy  ýüreklerde orun aldy.

Şol çuňňur paýhasa eýlenen çykyşyň girişinde: –– Türkmenistan parahatçylyk we ynanyşmak ideýasyny gönüden-göni ykdysady ösüş bilen baglanyşdyrýar. Şoňa görä-de, şu ýyl — Halkara parahatçylyk we ynanyşmak ýyly ykdysady hyzmatdaşlyga güýçli itergi bermelidir. Biz parahatçylygyň, ynanyşmagyň, deňhukuklylygyň, özara bähbitleriň ykdysady hyzmatdaşlygyň esasyny düzmelidigine ynanýarys. Islendik iri ykdysady, üpjünçilik, söwda we maýa goýum taslamalary diňe durnuklylyk hem-de birek-birege ynam bolan ýagdaýynda üstünlikli bolup biler – diýen dürdäne sözler Arkadagyň dünýä halklaryna çakylygy bolup ýaňlandy. Gahryman Arkadagymyz öz çykyşynda Türkmenistan — Owganystan — Pakistan — Hindistan gaz geçirijisiniň ähmiýetine maslahata gatnaşyjylaryň ünsüni çekdi. Bu gaz geçirijiniň ýurdumyzyň çäklerinden geçýän, uzynlygy 214 kilometr bolan bölegi gurulyp, häzirki wagtda onuň gurluşygy Owganystanyň çäklerinde dowam etdirilýär.  Milli Liderimiz hünärmenleriň baha bermegine görä, gaz geçirijiniň we degişli üpjünçilik ulgamlarynyň, täze edara-kärhanalaryň gurulmagy Owganystanda 12 müň iş ornuny döretmäge mümkinçilik berjekdigini aýtdy. Diýmek, bu taslama 1 milliard 750 million ilaty bolan ýurtlary tebigy gaz bilen üpjün etmek bilen çäklenmän, 12 müň ojaga berekedine bereket, rysgalyna rysgal hem goşar.

Milli Liderimiz çykyşynda häzirki döwrüň global we sebitara meselelerine hem  ünsi çekdi. Ol halkara hyzmatdaşlygynyň, ynanyşmagyň we durnukly ösüşiň döwletler üçin möhüm ugur bolup durýandygyny belläp, Türkmenistanyň bu ýörelgeleri iş ýüzünde durmuşa geçirýändigini nygtady.

 Maslahatyň netijeleri halkara hyzmatdaşlygyň giňeldilmegine, durnukly ykdysady ösüşiň üpjün edilmegine we parahatçylykly ösüşiň täze mümkinçilikleriniň açylmagyna itergi berer. Bu taryhy waka türkmen halkynyň ösüş ýolundaky ýene-de bir buýsançly sahypa bolup, ýurdumyzda alnyp barylýan parahatçylykly we ynanyşmaga esaslanýan syýasatyň dabaralanýandygyny görkezdi.

Türkmenistanyň Söwda-senagat edarasynda geçirilen bu taryhy waka döwletimiziň halkara abraýyny has-da belende göterdi. Gahryman Arkadagymyzyň çykyşynda beýan edilen pikirler we öňe sürlen başlangyçlar ýurdumyzyň dünýä derejesindäki parahatçylykly syýasatynyň we durnukly ösüş strategiýasynyň aýdyň beýany boldy.

Şeýle-de Gahryman Arkadagymyz Merkezi hem-de Günorta Aziýany birleşdirýän üstaşyr ulag geçelgelerini netijeli ulanmagyň, täzelerini döretmegiň zerurdygyny aýratyn belledi. –– Bu bolsa Demirgazyk — Günorta we Gündogar — Günbatar ugurlary boýunça ýolagçylary gatnatmagy, ýükleri daşamagy doly üpjün etmäge mümkinçilik berer –– diýip aýtdy.

Gahryman Arkadagymyzyň,  Arkadagly Gahryman Serdarymyzyň ýolbaşçylygynda bu ýollar dünýa ýurtlaryna elektrik energiýasyny, türkmen gazymyzy eltýär. Halkymyzyň köňül  «energiýasyny», sungatymyzy, aýdym-sazymyzy eltýär. Işewir hyzmatdaşlyklar, dostana gatnaşyklar bilen biziň özümizi eltýär.  Dostlarymyzy bize getirýär. Goý, Gahryman Arkadagymyzyň, Arkadagly Gahryman Serdarymyzyň janlary sag, başlary dik, tutýan tutumly işleri rowaç alsyn!

                                                         Türkmenistanyň Söwda-senagat edarasynyň

                                                                                                    Metbugat gullugy.