Makalalar

Täze taryhy döwrümizde Gahryman Arkadagymyzyň hem-de hormatly Prezidentimiziň tagallalary bilen milli ykdysadyýetimiziň pudaklary durnukly ösüşe eýe bolýar. Şunda giň wekilçilikli işewürlik maslahatlary, sergi-ýarmarkalar guralyp, ýurdumyzyň ykdysady kuwwaty, senagat, maýa goýum mümkinçilikleri, olardan netijeli peýdalanmak babatda alnyp barylýan işleriň gerimi giňden açylyp görkezilýär. Şu jähetden, 29-njy aprel — 1-nji maý aralygynda paýtagtymyzdaky Söwda-senagat edarasynda «Halkara söwda we hyzmatlar» atly sergi-ýarmarkanyň hem-de «Türkmenistanda halkara ülňülerine laýyk gelýän hil üpjünçiligi» atly halkara maslahatyň geçirilmegi möhüm ähmiýete eýedir.

ÝOKARY HIL WE BÄSDEŞLIK

Döwlet Baştutanymyzyň foruma gatnaşyjylara iberen Gutlagynda: «Halkara bazarlarda özara bähbitli, açyk, deňhukukly hyzmatdaşlygy ösdürmegiň, ýurdumyzyň eksport mümkinçiligini artdyrmagyň, sarp edijileriň hukuklaryny goramagyň möhüm şerti hökmünde harytlaryň we hyzmatlaryň ýokary hil standartlaryna laýyk gelmegine uly üns berilýär» diýlip bellenilýär. Şunuň bilen baglylykda, üç günläp dowam eden forum önümleriň we hyzmatlaryň hilini ýokarlandyrmakda halkara hyzmatdaşlygy, özara bähbitli söwda gatnaşyklaryny ösdürmek üçin möhüm meýdança boldy.

Sergi-ýarmarka we halkara maslahata ýurdumyzyň döwlet hem-de hususy düzümleri bilen bir hatarda, daşary ýurtlaryň 30-dan gowragyndan, şol sanda Amerikanyň Birleşen Ştatlaryndan, Awstraliýadan, Serbiýadan, Slowakiýadan, Şweýsariýadan, Şwesiýadan, Ysraýyldan, Azerbaýjandan, Latwiýadan, Malaýziýadan, Oman Soltanlygyndan, Hytaýdan, Koreýa Respublikasyndan, Polşadan, Birleşen Arap Emirliklerinden, Russiýadan, Belarusdan, Türkiýeden, Gazagystandan, Germaniýadan, Niderlandlardan, Italiýadan, Özbegistandan, Täjigistandan, Gyrgyzystandan, Mongoliýadan, Müsürden, Beýik Britaniýadan, Ýaponiýadan, Hindistandan wekiller gatnaşdylar. Umuman, sergide ýurdumyzyň we daşary ýurtlaryň kompaniýalarynyň 140-dan gowragy hem-de halkara düzümler öz işleridir hyzmatdaşlyk mümkinçilikleri bilen tanyşdyrdylar.

YKDYSADY DURNUKLYLYGYŇ BINÝADY

Sergi-ýarmarka köpugurlylygy bilen tapawutlanyp, bu ýerde ISO, «Halal», ESG, GMP, «GLOBALG.A.P» ýaly halkara sertifikatlaşdyryş düzümleriniň iş aýratynlyklary hakynda-da gürrüň berildi. Şu gezekki forum hususy düzümleriň öndürýän önümlerini we hödürleýän hyzmatlaryny dünýä bazarlaryna çykarmak, daşary ýurt maýa goýumlaryny çekmek, önümçilige halkara hil standartlarynyň ornaşdyrylmagynda halkara hyzmatdaşlygy ösdürmek üçin amatly şertleri döretdi. Sergi-ýarmarka daşary ýurtlaryň kompaniýalary we ilçihanalar hem işjeň gatnaşyp, türkmen bazaryna hödürleýän harytlarydyr hyzmatlary bilen tanyşdyrdylar.

Halkara forum dürli çärelere baý maksatnamasy bilen tapawutlanyp, onuň çäklerinde eksporty ösdürmek, sanly marketing we sertifikasiýa talaplary ýaly meseleler boýunça halkara hünärmenleriň maslahat beriş hyzmatlary hödürlenildi. Şeýle hem sergä gatnaşyjylaryň arasynda milli önümlere we hyzmatlara hil, meşhurlyk taýdan baha bermek bäsleşigi geçirildi. Mundan başga-da, aşpezlik, gül bilen bezemek sungaty ýaly ugurlarda hünärmenleriň ussatlyk çykyşlary guraldy.

HALKARA HYZMATDAŞLYK ― TÄZE GÖZÝETIMLER

Sergi-ýarmarka bilen ugurdaşlykda, Söwda-senagat edarasynyň maslahatlar zalynda «Türkmenistanda halkara ülňülere laýyk gelýän hil üpjünçiligi» atly halkara maslahat hem geçirildi. Şunda ýokary tehnologiýalar bilen üpjün edilen kärhanalary döretmek, bar bolanlarynyň işini döwrebaplaşdyrmak, önümleri halkara hil ölçeglerine laýyk sertifikatlaşdyrmak, eksport işini ösdürmek ýaly ugurlarda özara pikir alyşmalar forumyň esasy gün tertibini düzdi.

Maslahatyň ýörite bölümçesinde oba hojalygynda howpsuzlygy üpjün etmek boýunça «GLOBALG.A.P.» ülňüleriniň ähmiýeti hem-de olaryň Türkmenistanda we Merkezi Aziýada ornaşdyrylyşy, organiki şahadatnamalaryň görnüşleri barada pikir alyşmalar boldy. Forumyň çäklerinde geçirilen «Ýangyç-energetika pudagynda sertifikatlaşdyryş», «Azyk senagaty», «Dokma we ýeňil senagat», «Maglumat tehnologiýalary we startaplar üçin ülňüler», «Merkezi Aziýa sebitinde söwda, ülňüler, sertifikatlaşdyryş we akkreditasiýa meseleleri» atly bölümçelerde gyzyklanma bildirilýän ugurlarda bar bolan mümkinçilikler ara alnyp maslahatlaşyldy.

Şeýlelikde, şu gezekki forum milli ykdysadyýeti döwrebaplaşdyrmakda, diwersifikasiýalaşdyrmakda we sanlylaşdyrmakda, döwletimiziň dünýä hojalyk gatnaşyklaryna işjeň goşulyşmagynda, şeýle hem ilatyň ýaşaýyş-durmuş derejesini yzygiderli ýokarlandyrmakda möhüm ähmiýete eýedir.

                                                                               Atamyrat ÝAZWELIÝEW,

                                                       Türkmenistanyň Daşary işler      ministrliginiň     

                                                          Halkara gatnaşyklary institutynyň talyby

                                                         Çeşme: «Nesil»  gazeti. 03.05.2025