Makalalar

Bazar ykdysadyýetiniň ýiti bäsdeşlik şertlerinde önümler we hyzmatlar bilen müşderilere tanyşdyrmakda, olaryň aýratynlyklaryny düşündirip, ykdysady ösüşi ilerletmekde halkara sergilerine möhüm orun degişlidir. Adaty mahabatlar sarp edijiler, halk köpçüligi üçin niýetlenen bolsa, sergilerdir ýarmarkalar, esasan, işewürler üçin peýdalydyr. Şundan ugur alnyp, ýurdumyzyň ykdysadyýetini ösdürmekde sergileriň işine uly ähmiýet berilýär.

Sergilerdir ýarmarkalar önümleri we hyzmatlary bazarda ýerlemäge giň mümkinçilikleri açýar. Telekeçiler we işewürler şeýle çärelere öz kärdeşleriniň, hyzmatdaşlarynyň alyp barýan işleri, ýeten derejeleri, gazanan tejribeleri bilen içgin tanyşmak, şeýle hem degişli bazaryň ösüş ugurlaryny öwrenmek maksady bilen gatnaşýarlar. Şeýle çärelerde harytlary we hyzmatlary hödürleýjiler müşderiler bilen ýüzbe-ýüz bolup, olaryň isleglerini öwrenýärler. Sarp edijiler bolsa hünärmenler bilen duşuşyp, harytlaryň we hyzmatlaryň artykmaç ýa-da kemçilikli taraplaryny öwrenmäge mümkinçilik alýarlar.

Sarp edijileriň islegini öwrenmek harydy ýa-da hyzmaty kämilleşdirmekde, oňa täzeçillikleri girizmekde hökmany göz öňünde tutulmaly şertleri kesgitlemäge kömek edýär. Şeýle hem halkara sergi-ýarmarkalary degişli ugurdaky dünýä tejribesini öwrenmäge, daşary ýurtly işewürleriň iş usullary, marketing gurallary bilen tanyşmaga mümkinçilik berýär. Sergi-ýarmarkalar täze önümleriň we hyzmatlaryň netijeliligini barlamak üçin hem oňaýly meýdançadyr. Adatça, islendik önüm ýa-da hyzmat haýsydyr bir kärhananyň hünärmenleriniň garaýşy esasynda işlenip taýýarlanylýar. Diňe bir içerki bazarda däl, eýsem, daşary ýurtly bilermenleriň hem täze önümi ýa-da hyzmaty synagdan geçirmegi kemçilikleri has tiz ýüze çykarmaga, oňa täzeçe göz bilen garamaga ýardam berýär. Sergilerdir ýarmarkalar önümçiligiň we hyzmatlaryň ösüş ugurlaryny görmäge, halkara bazarlara çykmaga, şol bir ugurda iş alyp barýan kärhanalar üçin bäsdeşleriniň önümleriniň we hyzmatlarynyň hiline baha bermäge, nyrhlary öwrenmäge mümkinçilik berýär.

Soňky ýyllarda halkara sergiler bilen utgaşykly geçirilýän maslahatlar hem ykdysady hyzmatdaşlygy ösdürmegiň möhüm guraly hasaplanýar. Çünki sergi-ýarmarkalara diňe bir işewürler däl-de, dünýä belli kompaniýalaryň, abraýly halkara guramalaryň ýolbaşçylary we bilermenleri gatnaşýar. Gözden geçirilişler bilen utgaşykly guralýan maslahatlar bazaryň öňdebaryjylarynyň tejribeleri, ylmy-gözlegleriň netijelerine esaslanýan täzeçil çemeleşmeleri bilen tanyşmaga kömek edýär. Maslahatlar hem edil sergiler ýaly, täze müşderileri we ygtybarly hyzmatdaşlary tapmak üçin ajaýyp mümkinçilikleriň giňişligidir.

Diýarymyzda yzygiderli geçirilýän halkara sergiler we maslahatlar hem ykdysady ösüşi ilerletmekde diýseň ähmiýetlidir. Soňky ýyllarda ýurdumyzda geçirilýän halkara sergileriň görnüşleriniň artýandygy we her bir forumyň giň gerimi bilen tapawutlanýandygy begendirýär. Munuň özi hormatly Prezidentimiz tarapyndan tassyklanan «Türkmenistanyň halkara sergi işiniň 2024-2025-nji ýyllar üçin Konsepsiýasynyň» üstünlikli durmuşa geçirilýändigini tassyklaýar.

Bitarap Watanymyzda sergi işini ösdürmek halkara hyzmatdaşlygy berkitmegiň hem möhüm ugry hasaplanýar. Şunuň bilen baglylykda, 2023-nji ýylyň 28-nji noýabrynda Parižde geçirilen Halkara sergiler býurosynyň Baş Assambleýasynyň 173-nji mejlisiniň dowamynda Türkmenistanyň ilkinji gezek 2024-2025-nji ýyllar üçin bu guramanyň Dolandyryş we býujet boýunça komitetiniň düzüminiň agzalygyna saýlanandygyny bellemek gerek. Şu ýylyň 19-njy martynda Aşgabat şäherinde Halkara sergiler býurosynyň Baş sekretarynyň gatnaşmagynda degişli komitetiň nobatdaky mejlisiniň geçirilmegi hem bu ugurda möhüm waka öwrüldi.

Elbetde, 29-njy aprel — 1-nji maý aralygynda paýtagtymyz Aşgabatda nobatdaky iri wekilçilikli forumlaryň guralmagy bu babatdaky tejribeleri artdyrmakda uly ähmiýete eýedir. Söwda-senagat edarasynda geçirilýän «Halkara söwda we hyzmatlar» atly sergi-ýarmarka hem-de «Türkmenistanda halkara ülňülerine laýyk gelýän hil üpjünçiligi» atly halkara maslahata ýurdumyzyň söwda toplumyna degişli hem-de ugurdaş ministrlikleriň, pudaklaýyn dolandyryş edaralarynyň, Senagatçylar we telekeçiler birleşmesiniň agzalarynyň, daşary ýurt kompaniýalarynyň, guramalaryň köp sanly wekilleri gatnaşýar. Bu çäreler döwlet düzümlerine hem-de telekeçilere önümleriň we hyzmatlaryň hilini gowulandyrmagyň iň möhüm meselelerini ara alyp maslahatlaşmaga, daşary ýurtly işewürler bilen hyzmatdaşlyk gatnaşyklaryny giňeltmäge, işewürligi ösdürmäge ýardam etjek meýdança öwrüler. «Türkmenistanda halkara ülňülerine laýyk gelýän hil üpjünçiligi» atly halkara maslahata gatnaşyjylar öňdebaryjy dünýä tejribesi bilen tanyşmaga, önümleriň we hyzmatlaryň hilini ýokarlandyrmagyň usullaryny ara alyp maslahatlaşmaga mümkinçilik aldylar. Munuň özi önümleridir hyzmatlary halkara bazarynda ilerletmekde uly ähmiýete eýedir. Bu çärelere onlarça döwletden köp sanly işewür düzümleriň gatnaşmaga isleg bildirmegi Türkmenistanyň ykdysadyýetine gyzyklanmanyň ýokarydygyny tassyklaýar.

Sergi işiniň ösdürilmegi ýurdumyzyň dünýäniň ykdysady, medeni, maglumatlar giňişligine goşulyşmagynyň möhüm ugry bolup durýar. Bu günki gün ýurdumyzyň ministrlikleri we pudaklaýyn dolandyryş edaralarynyň kärhanalary, şeýle hem hususy telekeçiler dürli ýurtlarda geçirilýän sergilere, forumlara işjeň gatnaşýar. Ýakyn ýyllarda bolsa ýurdumyzyň iň iri halkara sergilere gatnaşmagy bilen birlikde, olary Türkmenistanda geçirmegiň mümkinçilikleri öwrenilýär. Elbetde, munuň özi hormatly Prezidentimiziň hem-de Gahryman Arkadagymyzyň tagallalary esasynda gülläp ösýän ýurdumyzyň halkara ykdysady giňişlikdäki ornunyň barha pugtalanýandygyna şaýatlyk edýär.

                                                                  Baýrammyrat AMANMYRADOW,

                                                                 Türkmenistanyň Senagatçylar we       

                                                                  telekeçiler partiýasynyň Aşgabat şäher       

                                                                  komitetiniň başlygynyň orunbasary.

                                                                   Çeşme: «Watan» gazeti 29.04.2025