Täzelikler

Hormatly sergi-ýarmarka we maslahata gatnaşyjylar!

Gadyrly myhmanlar!

Sizi Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda ak mermerli Aşgabatda geçirilýän «Halkara söwda we hyzmatlar» atly sergi-ýarmarkanyň hem-de «Türkmenistanda halkara ülňülere laýyk gelýän hil üpjünçiligi» atly halkara maslahatyň öz işine başlamagy bilen tüýs ýürekden gutlaýaryn. Bu giň möçberli çäreleriň halkara söwdany ösdürmekde, hyzmatlar ulgamyny kämilleşdirmekde, ylmyň we tehnologiýanyň gazananlaryny önümçilige ornaşdyrmak esasynda ýokary hilli, ekologik taýdan arassa, halkara ülňülere laýyk gelýän harytlary dünýä bazarlarynda ilerletmekde uly ähmiýete eýe boljakdygyna berk ynanýaryn.

Hormatly adamlar!

Gadyrly sergä we maslahata gatnaşyjylar!

Häzirki döwürde Türkmenistanyň ykdysady ösüşiniň ylmy çemeleşmä, hojalygy netijeli ýöretmäge we meýilnamalaşdyrmaga esaslanýan strategiýasy üstünlikli durmuşa geçirilýär. Bu strategiýa ykdysadyýeti döwrebaplaşdyrmaga, diwersifikasiýalaşdyrmaga we sanlylaşdyrmaga, iň täze tehnologiýalary, innowasiýalary giňden ornaşdyrmaga, döwletimiziň dünýä hojalyk gatnaşyklarynyň ulgamyna işjeň goşulyşmagyna, ilatyň ýaşaýyş-durmuş derejesini yzygiderli ýokarlandyrmaga gönükdirilendir. Halkara ülňülere laýyk gelýän hil üpjünçiligi häzirki zaman ykdysadyýetiniň wajyp ugurlarynyň biridir. Halkara bazarlarda özara bähbitli, açyk, deňhukukly hyzmatdaşlygy ösdürmegiň, ýurdumyzyň eksport mümkinçiligini artdyrmagyň, sarp edijileriň hukuklaryny goramagyň möhüm şerti hökmünde harytlaryň we hyzmatlaryň ýokary hil standartlaryna laýyk gelmegine uly üns berilýär.

«Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynda» hem-de pudaklaýyn ösüş resminamalarynda bu maksatlara ýetmek üçin birnäçe möhüm wezipeler kesgitlenildi. Bu Maksatnamalary durmuşa geçirmekde gazanylan netijeler ýurdumyzyň ykdysady kuwwatynyň pugtalanýandygyna, milli ykdysadyýetimiziň öndürijilik ukybynyň artdyrylýandygyna, bazar gatnaşyklarynyň işjeňleşdirilýändigine, söwda we hyzmatlar ulgamynyň depginli ösüşiniň üpjün edilýändigine, ähli ulgamlarda sanly tehnologiýalaryň işjeň ornaşdyrylýandygyna şaýatlyk edýär.

Bitarap ýurdumyzyň alyp barýan «Açyk gapylar» syýasatynyň çäklerinde dünýä ýurtlarynyň kompaniýalary bilen özara bähbitli hyzmatdaşlygy has-da ösdürmek üçin uly mümkinçilikler döredilýär. Türkmenistanyň Bütindünýä Söwda Guramasynda «işjeň synçy» derejesiniň bolmagy ýurtda önümçilik düzümlerini ösdürmäge, eksport mümkinçiliklerini artdyrmaga we halkara söwda-ykdysady gatnaşyklar ulgamyna has işjeň goşulyşmaga giň mümkinçilikleri açýar. Ýurdumyzyň söwda ulgamyny has-da kämilleşdirmek we döwrebaplaşdyrmak, Türkmenistanda öndürilýän ýokary hilli, ekologik taýdan arassa we bäsdeşlige ukyply harytlary dünýä bazarlarynda giňden tanatmak, daşary ýurtly hyzmatdaşlar bilen özara bähbitli gatnaşyklary ösdürmek ugrunda maksatnamalaýyn işler amala aşyrylýar.

Ykdysadyýeti bazar gatnaşyklaryna geçirmegiň, döwrebap özgertmeleri üstünlikli durmuşa geçirmegiň netijesinde Türkmenistan dünýä bazarynda barha ähmiýetli orny eýeleýär. Ýurdumyzda we onuň çäklerinden daşarda geçirilýän sergiler, forumlar döwletimiziň häzirki döwürde gazanýan üstünliklerini, maýa goýum kuwwatyny açyp görkezmek üçin meýdança bolup hyzmat edýär. Daşary ýurtly gatnaşyjylara bolsa şeýle çäreler öz geljegi uly taslamalary bilen tanyşdyrmak üçin oňat mümkinçilikdir. Şu gün öz işine başlaýan sergi-ýarmarka hem-de halkara maslahat hem ýurdumyzyň söwda-ykdysady hyzmatdaşlygyny giňeltmekde, önüm öndürijileriň, hyzmatlar ulgamynyň eksport mümkinçiliklerine baha bermekde möhüm orny eýelär.

Hormatly adamlar!

Gadyrly myhmanlar!

Sizi «Halkara söwda we hyzmatlar» atly sergi-ýarmarkanyň hem-de «Türkmenistanda halkara ülňülere laýyk gelýän hil üpjünçiligi» atly halkara maslahatyň öz işine başlamagy bilen ýene-de bir gezek tüýs ýürekden gutlaýaryn. Size berk jan saglyk, ýurdumyzyň ykdysady kuwwatyny pugtalandyrmakda alyp barýan işleriňizde uly üstünlikleri arzuw edýärin.

Türkmenistanyň Prezidenti

Serdar BERDIMUHAMEDOW.

tdh.gov