TSSE Täzelikler

          2025-nji ýylyň 13-nji iýunynda Aşgabatda geçirilýän “TurkmenTextile Expo-2025” atly halkara sergi-ýarmarkasynyň üçünji güni döredijilikli we tälim beriş çäreler bilen dowam etdi. Bu günki çäreleriň aglabasy ýurdumyzyň hem-de daşary ýurtly meşhur dizaýnerleriň gatnaşmagynda geçirilen ussatlyk sapaklaryna bagyşlandy.

         Beýik Britaniýadan gelen meşhur moda dizaýneri Omar Mansur “Däp-dessury häzirki zaman modasy bilen birleşdirmek” atly ussatlyk sapagyny geçirdi. Ol çykyşynda türkmen halkynyň baý medeni mirasynyň häzirki zaman moda industriýasy bilen utgaşdyrylmagynyň mümkinçiliklerini açyp görkezdi.

         Fransiýa Respublikasynyň wekili Göwher Pirkulyýewa “Medeni mirasy gorap saklamak bilen bir hatarda adaty ussatlygy häzirki zaman dizaýnyna öwürmek” temasyndaky çykyşynda türkmen keşdeleriniň, el işleri bilen baglanyşykly elementleriň häzirki zaman dizaýn önümçiligindäki ähmiýetine ünsi çekdi.

         Gazagystanyň “Asyl-dizaýn” modalar öýüniň wekili Aýdarhan Haliýewiň “Gadymy Merkezi Aziýanyň dokma usullary we däp bolan egin-eşik görnüşleriniň häzirki zaman sungata bolan täsiri” atly ussatlyk sapagyny geçirdi. Ol Merkezi Aziýa sebitiniň baý dokma däpleriniň häzirki zaman modasyna täsirini mysallar arkaly düşündirdi.

         Şeýle hem Türkmenistanyň ýaş dizaýneri Jennet Agaýewa tarapyndan döredijilikli ussatlyk sapagy geçirildi. Ol milli matalary we bezegleri häzirki zaman lybaslarynda peýdalanylşyna ähmiýet berdi.

         Sergi-ýarmarka türkmen tekstil senagatynyň dünýä bazaryndaky orny bilen tanyşdyrmak, halkara hyzmatdaşlygyny ösdürmek we döredijilikli pikir alyşmak üçin möhüm meýdança hökmünde çykyş edýär. Çäräniň dowamynda dürli ýurtlardan hünärmenleriň gatnaşmagynda geçirilen duşuşyklar, çykyşlar we görkezme çäreler serginiň ähmiýetini has-da artdyrdy.

Türkmenistanyň Söwda-senagat edarasynyň

Metbugat gullugy.