TSSE Täzelikler

2024-nji ýylyň 26-njy noýabrynda  türkmen wekiliýeti Parižde geçirilen Halkara sergiler býurosynyň Baş assambleýasynyň 175-nji mejlisine gatnaşdy.

Bu çärä türkmen wekiliýetiniň düzüminde Türkmenistanyň Fransiýadaky Adatdan daşary we doly ygtyýarly ilçisi, Türkmenistanyň Halkara sergiler býurosynyň   hemişelik wekili Maksat Çaryýew, Türkmenistanyň Söwda-senagat edarasynyň başlygy Mergen Gurdow, Türkmenistanyň Söwda we daşary aragatnaşyklar ministrliginden  hem-de Türkmenistanyň Söwda-senagat edarasyndan wekiller gatnaşdylar.

Mejlisiň gün tertibine laýyklykda, Türkmenistanyň agza bolup durýan Halkara sergiler býurosynyň dolandyryş we býudjet, düzgünler, maglumat we aragatnaşyk hem-de ýerine ýetiriji komitetleriniň agzalary baradaky hasabatlar diňlenildi we ol hasabatlar tassyklanyldy.  Şeýle hem ýetip gelýän halkara sergilerine taýýarlyk işleriniň gidişi barada habarlar diňlenildi.   Soňra Ýaponiýanyň wekiliýetiniň Osaka-Konsaýda geçiriljek «EKSPO ─ 2025» sergisine taýýarlyk işleriniň barşy hakynda beren maglumatlary diňlenildi.

Mejlisde Saud Arabystany Patyşalygynyň wekilleriniň Er-Riýadda geçiriljek «EKSPO ─ 2030» sergisi, Serbiýa Respublikasynyň   «EKSPO ─ 2027» sergisi, 2027-nji ýylda Iokogamede geçiriljek Halkara bagbançylyk sergisi hem-de Italiýanyň wekiliýetiniň Milanda geçiriljek «Triennale ─ 2025» sergisi boýunça hasabatlaryna orun berildi.

Mejlisiň çäklerinde  Halkara sergiler býurosynyň Baş sekretary Dmitri Kerkentzes bilen Türkmenistanyň  wekiliýetiniň arasynda gysgajyk duşuşyk boldy. Duşuşykda Türkmenistanyň geljekde Halkara sergiler býurosy bilen hyzmatdaşlyk etmeginiň mundan beýläkki ösüşleri barada özara pikir alşyldy. Şeýle hem Türkmenistanyň agza bolup durýan Halkara sergiler býurosynyň dolandyryş we býudjet komitetiniň nobatdaky mejlisini 2025-nji ýylyň birinji ýarymynda Aşgabatda geçirmegiň meýilleşdirilýändigi bilen baglanyşykly meseleler ara alnyp maslahatlaşyldy.

Duşuşykda Jenap Dmitri Kerkentzes türkmen wekiliýetine Halkara sergiler býurosy bilen ýakyn aragatnaşygy berkitmäge işjeň gatnaşýandyklary üçin  minnetdarlyk bildirdi hem-de ol geljekde-de Sekretariýatyň özara bähbitli hyzmatdaşlyga taýýardygyny nygtady.

 Türkmenistanyň Söwda-senagat edarasynyň

Metbugat gullugy.