TSSE Täzelikler

       2025-nji ýylyň 17-nji iýunynda Türkmenistanyň Söwda-senagat edarasynyň wekilleri Fransiýa Respublikasynyň paýtagty Pariž şäherinde geçirilen Bütindünýä sergiler boýunça halkara býurosynyň (BIE) 176-njy mejlisine gatnaşdylar.

         Bu halkara derejesindäki möhüm çärede BIE agza döwletleriň wekilleri we halkara guramalaryň wekiliýetleri gatnaşdylar. Mejlisde häzirki wagtda geçirilýän hem-de meýilleşdirilýän halkara sergiler, şeýle hem guramanyň öňünde duran strategik wezipeler ara alnyp maslahatlaşyldy.

         Türkmenistanyň wekiliýeti mejlise gatnaşmak bilen, ýurdumyzyň BIE bilen hyzmatdaşlygynyň yzygiderli dowam etdirilýändigini görkezdi. Şeýle-de, mejlisiň dowamynda ýurdumyzyň ykdysady ösüşi, senagat hem-de söwda ulgamyndaky mümkinçilikleri we halkara sergilere gatnaşmak boýunça tejribesi beýan edildi.

         Türkmenistanyň wekilleri mejlise gatnaşyjy beýleki ýurtlaryň wekilleri bilen birnäçe ikitaraplaýyn duşuşyklary geçirip, geljekde halkara sergilerde işjeň gatnaşygy üpjün etmek we hyzmatdaşlygy giňeltmek meselelerini ara alyp maslahatlaşdylar.

         Türkmenistanyň BIE-niň işine yzygiderli gatnaşmagy ýurdumyzyň halkara abraýynyň ýokarlanmagyna hem-de dünýä döwletleri bilen ykdysady, medeni we innowasion hyzmatdaşlygynyň ösdürilmegine ýardam berýär.

Türkmenistanyň Söwda-senagat edarasynyň

Metbugat gullugy.