TSSE Täzelikler

     2025-nji ýylyň 29-njy aprelinde Türkmenistanyň Söwda-senagat edarasyny toý şowhuny gurşap aldy. «Halkara söwda we hyzmatlar» atly sergi-ýarmarkasy uly joşgun bilen badalga aldy. Sergi-ýarmarkasynyň açylyş dabarasy Hormatly Prezidentimiziň «Halkara söwda we hyzmatlar» atly sergi-ýarmarka hem-de «Türkmenistanda halkara ülňülere laýyk gelýän hil üpjünçiligi» atly halkara maslahata gatnaşyjylara iberen Gutlag hatynyň okalmagy bilen başlandy.

      Arkadagly Gahryman Serdarymyzyň Gutlag hatynda belleýşi ýaly:  «Ýurdumyzda we onuň çäklerinden daşarda geçirilýän sergiler, forumlar döwletimiziň häzirki döwürde gazanýan üstünliklerini, maýa goýum kuwwatyny açyp görkezmek üçin meýdança bolup hyzmat edýär. Daşary ýurtly gatnaşyjylara bolsa şeýle çäreler öz geljegi uly taslamalary bilen tanyşdyrmak üçin oňat mümkinçilikdir. Şu gün öz işine başlaýan sergi-ýarmarka hem-de halkara maslahat hem ýurdumyzyň söwda-ykdysady hyzmatdaşlygyny giňeltmekde, önüm öndürijileriň, hyzmatlar ulgamynyň eksport mümkinçiliklerine baha bermekde möhüm orny eýelär».

      Bu  sergi-ýarmarkasy Türkmenistandan we daşary ýurtlardan öňdebaryjy önüm öndürijileri, eksport-import edijileri birleşdirýän uly ähmiýetli çäreleriň biri  hökmünde elektron söwda, sanly logistika we önümçilik ugurlaryny awtomatlaşdyrmak pudaklarynda innowasion çözgütli hyzmatlary hem-de giň gerimli harytlary hödürleýär. Sergi bilen utgaşyklykda «Türkmenistanda halkara ülňülerine laýyk gelýän hil üpjünçiligi» atly halkara maslahaty hem geçirilýär. Bu möhüm ähmiýetli çäreler türkmen ykdysadyýetini dünýä bazarlaryna ilerletmek we onuň ornuny berkitmäge ýardam bermeklige gönükdirilendir.

                                                                                                             Türkmenistanyň Söwda-senagat edarasynyň

                                                                                                    Metbugat gullugy.