TSSE Täzelikler

17-nji martda günüň ikinji ýarymynda Türkmenistanyň Senagatçylar we Telekeçiler birleşmesiniň döredilmeginiň 17 ýyllygy mynasybetli guralan serginiň we «Türkmenistanyň geljegine maýa goýumlar»  atly halkara forumyň  çäklerinde Paýtagtymyzyň «Ýyldyz»  myhmanhanasynda möhüm ähmiýetli ikitaraplaýyn duşuşyklaryň birnäçesi geçirdi. Duşuşyklaryň esasy maksady söwda-ykdysady hyzmatdaşlygy giňeltmek, maýa goýum mümkinçiliklerini ara alyp maslahatlaşmak we işewürlik gatnaşyklaryny ösdürmekden ybarat  boldy.

Türkmenistanyň Söwda-senagat edarasynyň guramaçylygynda  geçirilen duşuşyklara sergä gelen wekiliýetleriň birnäçesi, esasan hem: Owganystanyň Söwda-senagat edarasynyň başlygy Tawakol Ahmadýar, Russiýa Federasiýasynyň Günorta Ural Söwda-senagat edarasynyň, Russiýa Federasiýasynyň Tula Söwda-senagat edarasynyň, «ZlatDekor» jogapkärçiligi çäklendirilen jemgyýetiniň, Gazagystan Respublikasynyň Astana şäheriniň Diplomatik klubynyň, «Lipetsk Söwda-senagat edarasynyň» birleşiginiň, Lipetsk oblastynyň eksporta gönükdirilen kiçi we orta telekeçiligi goldamak merkeziniň wekilleri gatnaşdylar.

Duşuşyklaryň dowamynda eksport-import gatnaşyklaryny ösdürmek, bilelikdäki taslamalary amala aşyrmak, söwda dolanyşygynyň möçberini artdyrmak we hususy pudagyň halkara bazarlara çykmagyny höweslendirmek bilen baglanşykly meseleler ara alnyp maslahatlaşyldy. Taraplar ykdysady gatnaşyklaryň geljegi barada pikir alyşdylar hem-de düri ugurlar boýunça hyzmatdaşlygy giňeltmek barada başlangyçlary öňe sürdüler.

Serginiň çäklerinde şeýle duşuşyklaryň ýene-de birnäçesini geçirmek göz öňünde tutulýar.     

Türkmenistanyň Söwda-senagat edarasynyň

Metbugat gullugy.