TSSE Täzelikler

         2025-nji ýylyň 13-nji aprelinden başlap, Ýaponiýanyň Osaka şäherinde geçirilýän «EKSPO — 2025»  Bütindünýä sergisi dünýäniň dürli döwletleriniň ösüş ugurlaryny, innowasion çözgütlerini hem-de milli aýratynlyklaryny görkezýän giň möçberli halkara çäredir. Bu sergide binagärlik çözgütleri «Belli» hojalyk jemgyýeti tarapyndan ýerine ýetirilen Türkmenistanyň milli pawilýony hem öz binagärlik gurluşy, içki giňişligi we mazmuny bilen aýratyn orun eýeleýär. Üç gatdan ybarat bolan pawilýon ýurdumyzyň häzirki zaman ösüşini, milli gymmatlyklaryny hem-de geljege gönükdirilen strategiki ugurlaryny dünýä jemgyýetçiligine giňden tanadýar.

         Pawilýonyň ilkinji gatynda myhmanlary giň hem-de bezegli meýdança garşy alýar. Bu ýerde Türkmenistanyň tebigaty, taryhy we medeniýeti bilen tanyşdyrýan wideoşekiller görkezilýär. Şeýle-de ýörite taýýarlanylan ýadygärlik sowgatlar dükanynda milli haly nagyşlary bilen bezelen ýadygärlikler, kitapçalar, bezeg esbaplary we beýleki milli önümler hödürlenýär. Bu giňişlik myhmanlarda  Türkmenistanyň milli özboluşlylygy barada ilkinji täsiri döredýän meýdança bolup çykyş edýär.

Pawilýonyň ikinji gatynda Türkmenistanyň häzirki zaman ösüşini görkezýän tematiki bölümler ýerleşdirilipdir. Bu gatda her bölüm aýratyn diwarlyklar, sanly paneller, wideolar we interaktiw serişdeler bilen üpjün edilendir.

Pawilýonyň iň ýokary gatynda myhmanlar üçin döredilen kafeteriýa we dynç alyş meýdançasy ýerleşýär. Bu ýerde türkmen milli tagamlary we çaý hödürlenýär. Tapçan görnüşinde döredilen oturgyçlar, rahat otaglar myhmanlaryň dynç almagy üçin niýetlenendir. Bu giňişlikde  milli myhmansöýerlik däplerimize eýerilip, hyzmat edilýär.

Bu täsirli taslama ýurdumyzyň häzirki ösüş ýoluny dünýä tanatmak bilen bir hatarda, halkara hyzmatdaşlygynyň täze mümkinçiliklerini hem açýar.

 Türkmenistanyň Söwda-senagat edarasynyň

 Metbugat gullugy.