TSSE Täzelikler

    Hormatly Prezidentimiziň öňdengörüjilikli syýasaty netijesinde, Türkmenistan halkara söwda-ykdysady gatnaşyklaryny işjeň ösdürýär. 2025-nji ýylyň 26-njy fewralynda Türkmenistanyň Söwda-senagat edarasynyň ýolbaşçysy bilen Gyrgyz Respublikasynyň Türkmenistandaky Adatdan daşary we Doly ygtyýarly ilçisi Madmarow Azizbekiň arasynda duşuşyk geçirildi.

         Iki ýurduň arasyndaky söwda-ykdysady hyzmatdaşlygy has-da berkitmek maksady bilen geçirilen duşuşykda, bilelikdäki işewürlik taslamalaryny durmuşa geçirmek we maýa goýumlary çekmek meseleleri ara alnyp maslahatlaşyldy. Esasan-da, 2025-nji ýylyň 17-19-njy marty aralygynda Türkmenistanyň Senagatçylar we Telekeçiler Birleşmesiniň döredilmeginiň 17 ýyllygy mynasybetli geçiriljek sergi we “Türkmenistanyň geljegine maýa goýumlar” atly halkara maýa goýum forumynyň çäklerinde Gyrgyzystanyň Söwda-senagat edarasynyň wekiliýetiniň ýolbaşçylygynda gyrgyz işewürleriniň gatnaşmagynda ikitaraplaýyn duşuşyklary guramak teklip edildi. Bu çäreler hormatly Prezidentimiziň ykdysady syýasatynyň üstünlikli amala aşyrylýandygynyň nobatdaky subutnamasydyr.

         Mundan başga-da, 2025-nji ýylyň 8-10-njy aprel aralygynda Gyrgyzystanda geçiriljek Russiýa-Ýewraziýa sebitiniň moda senagaty bilen baglanyşykly halkara sergä Türkmenistanyň Söwda-senagat edarasynyň ýolbaşçylygyndaky türkmen işewürleriniň gatnaşmagynyň zerurlygy bellenildi. Türkmen dokma we ýeňil senagat pudagynyň wekilleriniň bu sergä gatnaşmagy, olaryň halkara bazardaky ornuny pugtalandyrmaga we önümlerini täze bazarlara çykarmaga mümkinçilik döreder.

         Duşuşykda ulag-logistika ulgamyndaky hyzmatdaşlygy ösdürmek meselesine hem aýratyn üns berildi. Gyrgyzystan bilen Türkmenistany birleşdirýän ulag ýollarynyň gurulmagy we ösdürilmegi, iki ýurduň arasyndaky söwda dolanyşygynyň möçberini artdyrmaga itergi berjekdigi nygtaldy.

         Türkmenistan bilen Gyrgyzystanyň arasyndaky hyzmatdaşlygyň ösdürilmegi hem iki dostlukly ýurduň arasyndaky gatnaşyklary täze derejä çykarmak üçin oňyn ädimleriň biri bolup durýar.

Türkmenistanyň Söwda-senagat edarasynyň

Metbugat gullugy.