TSSE Täzelikler

      2025-nji ýylyň 18-nji sentýabrynda Türkmenistanyň Söwda-senagat edarasynda ýurdumyzyň Garaşsyzlygynyň 34 ýyllygyna bagyşlanyp geçirilýän ykdysady üstünlikleriň sergisi öz işine başlady. Üç gün dowam etjek sergi 20-nji sentýabrda tamamlanar.

         Serginiň açylyş dabarasyna ýurdumyzyň ministrlikleriniň, pudaklaýyn dolandyryş edaralarynyň, hususy we döwlet kärhanalarynyň, şeýle-de daşary ýurtlardan gelen myhmanlaryň we wekiliýetleriň gatnaşmagy bu çäräniň halkara ähmiýetiniň barha artýandygynyň nobatdaky subutnamasyna öwrüldi.

         Türkmenistanyň ykdysady ösüşinde gazanylan üstünlikleriň giňden şöhlelendirilýän bu sergisinde senagat, gurluşyk, oba hojalygy, energetika, ulag-logistika, dokma senagaty, IT tehnologiýalary we beýleki möhüm ugurlarda alnyp barylýan işler aýratyn orun alýar.

    Sergä gatnaşyjy kärhanalaryň we edara-kärhanalaryň diwarlyklarynda milli önümçiligiň netijeleri, täze tehnologiýalaryň ornaşdyrylmagy, eksport mümkinçilikleriniň giňeldilmegi bilen baglanyşykly maglumatlar we önümler görkezilýär. Ýurduň ykdysady kuwwatynyň, senagatlaşdyrmak syýasatynyň üstünlikleriniň, şeýle-de hususy pudagyň orny bilen tanyş bolmak isleýänler üçin bu sergi möhüm mümkinçilik döredýär.

         Türkmenistanyň ykdysady ösüşiniň nobatdaky derejesini aýdyň görkezýän bu sergi Garaşsyzlygyň baýramy mynasybetli geçirilýän dabaralaryň möhüm bölegi hökmünde giň jemgyýetçiligiň uly gyzyklanmasyna eýe boldy.

Türkmenistanyň Söwda-senagat edarasynyň

Metbugat gullugy.