TSSE Täzelikler

        2025-nji ýylyň 5 – 6-njy iýunynda Hindistanyň paýtagty Nýu-Deli şäherinde “Merkezi Aziýa – Hindistan” daşary işler ministrleriniň duşuşygy geçirildi. Bu halkara forum Merkezi Aziýanyň bäş döwleti – Türkmenistan, Gazagystan, Gyrgyzystan, Täjigistan, Özbegistan bilen Hindistanyň arasynda gatnaşyklaryň täze ugurlaryny kesgitlemekde möhüm ähmiýete eýedir.

         Duşuşygyň esasy maksady gatnaşyjy ýurtlaryň arasynda söwda, maýa goýum we ykdysady hyzmatdaşlygy ösdürmekden ybarat bolup durýar. Forumyň gün tertibine ykdysadyýetiň dürli pudaklarynda özara gatnaşyklary ösdürmek, bilelikdäki taslamalara itergi bermek we sebitleýin ösüşe oňyn täsir edýän hyzmatdaşlyk mehanizmlerini döretmek bilen baglanyşykly meseleler girizildi.  

         Forumyň çäginde 5-nji iýunda “Merkezi Aziýa – Hindistan” işewürlik forumy hem geçirildi. Bu çäre hökümet wekilleriniň hem-de işewür toparlaryň arasynda göni gepleşikler üçin netijeli platforma hökmünde çykyş edýär. Onda taraplar ikitaraplaýyn we köptaraplaýyn ykdysady hyzmatdaşlygyň ileri tutulýan ugurlaryny ara alyp maslahatlaşdylar.

         Türkmenistanyň Söwda-senagat edarasynyň wekilleri hem foruma gatnaşyp, ýurdumyzyň ykdysady mümkinçilikleri, eksport kuwwaty hakynda beýan etdiler. Şeýle-de  birnäçe ýurtlaryň işewür wekilleri bilen hyzmatdaşlyk mümkinçilikleri boýunça duşuşyklary geçirdiler.

        Bu forum Merkezi Aziýa bilen Hindistanyň arasyndaky gatnaşyklaryň işjeňleşdirilmeginde täze sahypany açyp, sebitleýin ykdysady ösüşe güýçli itergi berýär.

Türkmenistanyň Söwda-senagat edarasynyň

Metbugat gullugy.