TSSE Täzelikler

2025-nji ýylyň 26-27-nji  noýabrynda Katar Döwletiniň Doha şäherinde  Söwda-ykdysady hyzmatdaşlyk boýunça bilelikdäki hökümetara türkmen-katar  toparynyň 3-nji mejlisi geçirildi.

Mejlisiň başynda oňa gatnaşyjylar  Türkmenistanyň hem-de Katar Döwletiniň arasyndaky gatnaşyklaryň hil taýdan täze derejä çykandygyny belläp geçdiler we 2026-njy ýylda Aşgabatda Türkmenistan-Katar Ykdysady Forumyny geçirmekligi we çäräniň çäginde türkmen harytlarynyň sergisini guramak babatda  özara maslahatlaşyldy.

Iki tarap hem söwda we ykdysady ugurda  katar we türkmen telekeçileriniň arasynda özara saparlary we duşuşyklary işjeňleşdirmegiň möhümdigini bellediler.

 Türkmen hem katar wekiliýeti biri-biriniň ykdysady mümkinçilikleri bilen tanyşmagyna we tejribe alyş-çalşyny ýeňilleşdirmäge gönükdirilen bilelikdäki hususy pudak çärelerini — sergileri, söwda hepdeliklerini we ýöriteleşdirilen tanyşdyryş seminarlaryny guramak meselesini ara alyp maslahatlaşdylar.

Şeýle-de maýa goýum hyzmatdaşlygyny işjeňleşdirmek boýunça taraplaryň gyzyklanmasy beýan edildi. Hususan-da, ykdysadyýetiň dürli pudaklarynda maýa goýum taslamalary boýunça pikir alşylyp, onuň jemleri boýunça Söwda-ykdysady hyzmatdaşlyk boýunça hökümetara türkmen-katar toparynyň 3-nji mejlisiniň Teswirnamasyna gol çekildi.

Türkmen wekiliýetiniň Doha saparynyň çäklerinde Türkmenistanyň Söwda-senagat edarasynyň başlygy bilen Katar Döwletiniň Söwda-senagat edarasynyň başlygynyň birinji orunbasary Mohammed bin Tuwar Al Kuwariniň arasynda iş duşuşygy geçirildi. Duşuşykda iki ýurduň telekeçileriniň we işewür toparlarynyň arasynda işewür gatnaşyklary ösdürmek barada pikir alşyldy.

Mejlisde iki ýurduň we halklaryň giň gerimli hyzmatdaşlygy mundan beýläk-de pugtalandyrmaga bolan ygrarlylyklary bellenildi.

                                                         Türkmenistanyň Söwda-senagat edarasynyň

                                                                                                      Metbugat gullugy