TSSE Täzelikler

    2025-nji ýylyň 18-nji martynda Aşgabat şäheriniň «Ýyldyz» myhmanhanasynda geçirilen «Türkmenistanyň geljegine maýa goýumlar»  atly halkara forumyň çäklerinde daşary ýurt kompaniýalarynyň wekilleri bilen türkmen tarapynyň arasynda birnäçe möhüm ikitaraplaýyn duşuşyklar geçirildi. Duşuşyklaryň dowamynda Türkmenistanyň hususy kärhanalarynyň birnäçesi bilen daşary ýurt kompaniýalarynyň arasynda ýigrimiden gowrak Özara düşünişmek hakynda Ähtnama gol çekildi.

 Türkmenistanyň Söwda-senagat edarasynyň ýolbaşçysy Halkara söwda býurosynyň Baş sekretary Dmitri Kerkentzesiň ýolbaşçylygyndaky wekiliýet bilen duşuşdy. Bu duşuşykda 19-njy martda Türkmenistanyň Söwda-senagat edarasynda geçiriljek Halkara Sergiler Býurosynyň Dolandyryş-býujet komitetiniň mejlisi barada özara pikir alyşyldy.

   Şeýle hem Türkmenistanyň Söwda-senagat  edarasynyň wekiliýeti  «B2B Analitika», «Eko Trade»  jogapkärçiligi çäklendirilen jemgyýetleriň, Estoniýa Respublikasynyň Merkezi Aziýadaky Ilçihanasynyň, Estoniýa Respublikasynyň Söwda-senagat edarasynyň, «Clemco Baltic OÜ», « Nirgi Servis OÜ», «Baltic Trans Gas OÜ»,  «Globalsun OÜ» kompaniýalarynyň wekilleri bilen gepleşikleri geçirdiler. Duşuşyklaryň dowamynda  bilelikdäki maýa goýum taslamalary, sanly ykdysadyýet, ekologiýa, energetika we logistika bilen baglanşykly meseleler ara alnyp maslahatlaşyldy.

  Bu duşuşyklar Türkmenistanyň hususy pudagynyň halkara hyzmatdaşlygyny giňeltmekde we daşary ýurt maýadarlary bilen işewür gatnaşyklary ýola goýmakda möhüm ädim boldy. Forumyň çäginde geçirilen gepleşikleriň netijesinde geljekde bilelikdäki ylalaşyklaryň baglaşylmagy we täze maýa goýum taslamalarynyň durmuşa geçirilmegi meýilleşdirilýär.

Türkmenistanyň Söwda-senagat edarasynyň

Metbugat gullugy.