Makalalar

Aşgabatda Türkmenistanyň Senagatçylar we telekeçiler birleşmesiniň döredilmeginiň 17 ýyllygy mynasybetli sergi hem-de «Türkmenistanyň geljegine maýa goýumlar» atly halkara forumy guraldy. Üç günläp dowam eden bu sergä welaýatymyzyň «Tebigy ekin» daýhan hojalygy, «Asuda akym», «Döwletli Döwran», «Ak Bulut» hojalyk jemgyýetleri hem öz önümleri bilen gatnaşdylar. Olaryň ýokary hilli önümlerine daşary ýurtly işewürler uly gyzyklanma bildirdiler.

Sergä gatnaşanlar bilen duşuşyp, söhbetdeş bolanymyzda «Ak Bulut» hojalyk jemgyýetiniň satyş boýunça hünärmeni Gülruh Hajyýewa özünde galan täsirleri biziň bilen paýlaşdy:

— Biz sergä öndürýän gipsokarton, metal görnüşindäki asma potoloklary, gurluşyk gury garyndylary, gurluşyk gipsi, şeýle-de çyryşlaryň dürli görnüşini getirdik. Bu gurluşyk önümlerimiz Gazagystan, Özbegistan, Gyrgyzystan, Russiýa Federasiýasy, Hytaý Halk Respublikasy, Malaýziýa ýaly ýurtlaryň işewürlerinde uly gyzyklanma döretdi. Olaryň aglabasy geljekde biziň bilen söwda etmek meýilleriniň bardygyny aýtdylar. Ýeri gelende belläp geçsem, häzirki wagta çenli hojalyk jemgyýetimiziň önümleri Özbegistan, Gyrgyzystan, Gruziýa, Azerbaýjan ýaly ýurtlara yzygiderli eksport edilýär. Öz ýokary hilli önümlerimiz bilen daşary ýurtlarda geçirilýän söwda sergilerine-de işjeň gatnaşýarys. Biziň esasy maksadymyz bolsa öz milli önümlerimizi daşarky bazarlarda has giňden tanatmakdan ybaratdyr. Munuň üçin döwlet Baştutanymyz ähli amatly şertleri döredip berýär.

Özleri üçin döredilen mümkinçiliklerden göwünleri galkynyp, işlerini has-da döwrebap derejede alyp barýan «Asuda akym» hojalyk jemgyýeti hem bu sergä «Şir ýag» haryt nyşanly çalgy ýaglary bilen gatnaşdy.

— Şeýle sergileriň dowamly guralmagy, telekeçiler üçin örän ähmiýetlidir. Hususyýetçiler öz önümlerini daşary ýurtly işewürlere görkezmäge we olar bilen netijeli hyzmatdaşlygy berkitmäge mümkinçilik alýarlar. Häzirki wagtda biziň hojalyk jemgyýetimizde awtoulaglar üçin niýetlenilen çalgy ýaglarynyň 25 görnüşi öndürilýär. Biz bu ýaglaryň ähli görnüşini sergä getirdik. Sergä gatnaşyjy daşary ýurtly telekeçileriň aglabasy bu ýaglar bilen içgin gyzyklandy. Eýýäm Gazagystanyň, Özbegistanyň, Russiýa Federasiýasynyň işewürleri biziň bilen geleşikleri baglaşmaga-da isleg bildirdiler — diýip, «Asuda akym» hojalyk jemgyýetiniň wekili, ýaş inžener Döwrangeldi Muhammedow buýsanç bilen gürrüň berýär.

Bezeg keramiki kerpiçleri bilen meşhur bolan «Döwletli Döwran» hojalyk jemgyýetiniň we «Tebigy ekin» daýhan hojalygynyň sergä getiren önümleri hem aýratyn bellenilmäge mynasypdyr. Çünki ýurdumyzda gurulýan ajaýyp binalaryň ençemesine aýratyn öwüşgin berýän «Döwletli Döwranyň» bezeg keramiki kerpiçleriniň indi Özbegistanda-da islegli harytlaryň hatarynda tanalyp başlanylmagy buýsandyryjy ýagdaýdyr. Hojalyk jemgyýetiniň satyş menejeri Danir Şakirow «Döwletli Döwranyň» önümleriniň Halkara parahatçylyk we ynanyşmak ýylynda Gazagystan, Özbegistan döwletlerinde guralan sergilere gatnaşandygyny we häzirki wagtda-da Özbegistana bezeg-keramiki kerpiçleriň dowamly eksport edilýändigini belledi.

Ildeşlerimiz netijeli işlemäge we şeýle ýokary derejeli sergilere hem-de forumlara gatnaşmaga döredip berýän giň mümkinçilikleri üçin hormatly Prezidentimize ak ýürekden hoşallyklaryny bildirýärler.

Atanyýaz HANGELDIÝEW, 

                                                                                                                                                                                                                                   Çeşme: «Türkmen gündogary»  gazeti

https://www.turkmenmetbugat.gov.tm/tk/newspapers/11/articles/186173

19.03.2025