Makalalar

Hormatly Prezidentimiziň parasatly baştutanlygynda ýurdumyzda amala aşyrylýan giň gerimli maksatnamalar halkymyzyň ýaşaýyş-durmuş şertlerini ýokarlandyryp, döwletimiziň ykdysady kuwwatyny has artdyrýar.

Türkmen halkynyň Milli Lideri Gahryman Arkadagymyzyň «Garaşsyzlyk bagtymyz» atly eserinde nygtaýşy ýaly: «Telekeçilik işi Türkmenistanyň dünýä ykdysady ulgamyna goşulyşmagyna, işiň öňdebaryjy usullaryna geçmäge ýardam edýär. Şonuň üçin döwletimiz hususy telekeçiligi işjeň goldaýar. Bu, hususan-da, ýurdumyzyň ykdysadyýetiniň oba senagaty, syýahatçylyk, söwda, dokma senagaty, azyk senagaty, ulaglar, hyzmatlar, gurluşyk senagaty ýaly ugurlaryna degişlidir».

29-njy aprelde paýtagtymyzyň Söwda-senagat edarasynda öz işine başlan «Halkara söwda we hyzmatlar» atly sergi-ýarmarka hem-de «Türkmenistanda halkara ülňülere laýyk gelýän hil üpjünçiligi» atly halkara maslahaty hem ýurdumyzy senagat taýdan ösen ýurda öwürmek, azyk howpsuzlygyny pugtalandyrmak, import edilýän harytlaryň ornuny tutýan önümleriň önümçiliginiň möçberini artdyrmak, söwda hyzmatlaryny kämilleşdirmek, ilatyň gündelik sarp edilýän harytlara bolan islegini kanagatlandyrmak ýaly wezipeleri üstünlikli durmuşa geçirmekde gazanylan üstünlikleriň aýdyň dabaralanmasy boldy. Halkara parahatçylyk we ynanyşmak ýylynyň şanly wakalaryny baýlaşdyran bu çäre Garaşsyz Türkmenistanyň oňyn Bitaraplyk, parahatçylyk söýüjilik, hoşniýetli goňşuçylyk, sebit we dünýä derejesinde deňhukukly hyzmatdaşlyk ýörelgelerine esaslanýan daşary syýasat strategiýasyny üstünlikli durmuşa geçirýändiginiň hem nobatdaky beýany boldy.

Ýeri gelende bellesek, 14-nji aprelde Ýaponiýa döwletiniň Osaka şäherinde açylan, 2025-nji ýylyň 13-nji oktýabryna çenli dowam edýän «EKSPO — 2025» Bütindünýä sergisinde Türkmenistanyň milli pawilýony öz işini üstünlikli alyp barýar. Çünki Arkadagly Gahryman Serdarymyzyň «EKSPO — 2025» Bütindünýä sergisinde Türkmenistanyň Milli güni mynasybetli dabaraly çärelere gatnaşmagy bu ugurdaky işleri has işjeňleşdirdi.

Bu pudagyň işiniň yzygiderli kämilleşmegine ýardam edýän «Kiçi we orta telekeçiligi döwlet tarapyndan goldamak hakynda», «Türkmenistanyň Senagatçylar we telekeçiler birleşmesi hakynda»,  «Telekeçilik işi hakynda», «Söwda işi hakynda» Türkmenistanyň Kanunlary we bu ugurdaky kanunçylyk namalary ulgamyň kämil hukuk binýady bolup hyzmat edýär.

Hut şonuň netijesinde hem Diýarymyzda kiçi we orta telekeçiligi höweslendirmekde amatly hukuk, ykdysady, maliýe şertleri döredi. Salgyt ulgamynyň kämilleşdirilmegini, telekeçilik işini hasaba almak we ygtyýarlandyrmak tertibiniň ýeňilleşdirilmegini, hususy önüm öndürijileriň öz harytlaryny daşary ýurtlara eksport etmekleri üçin gümrük işleriniň çaltlandyrylmagyny, ýeňillikli karz serişdeleriniň bölünip berilmegini muňa mysal hökmünde görkezmek bolar.

2008-nji ýylyň 17-nji martynda Milli Liderimiziň parasatly başlangyjy bilen eýeçiligiň hususy görnüşiniň esasynda işini amala aşyrýan senagatçylary we telekeçileri birleşdirýän jemgyýetçilik guramasy — Türkmenistanyň Senagatçylar we telekeçiler birleşmesiniň döredilmegi bilen ýurdumyzyň ykdysadyýetiniň ähli önümçilik pudaklarynyň eksport mümkinçilikleriniň artandygyna, importyň ornuny tutýan önümleriň öndürilişiniň bolsa has-da köpelendigine göz ýetirýäris. Milli Liderimiziň beýik tagallalary bilen dag-magdan pudagy, elektron senagaty ýaly döwletimiz üçin bütinleý täze pudaklaryň kemala gelmeginde we ösmeginde  ýurdumyzyň telekeçileriniň hem mynasyp goşantlarynyň bardygy diýseň buýsandyrýar.

Hormatly Prezidentimiziň bu halkara çärä gatnaşyjylara iberen Gutlagynda hem nygtalyşy ýaly:  häzirki döwürde Türkmenistanyň ykdysady ösüşiniň ylmy çemeleşmä, hojalygy netijeli ýöretmäge we meýilnamalaşdyrmaga esaslanýan strategiýasy üstünlikli durmuşa geçirilýär. Bu strategiýa ykdysadyýeti döwrebaplaşdyrmaga, diwersifikasiýalaşdyrmaga we sanlylaşdyrmaga, iň täze tehnologiýalary, innowasiýalary giňden ornaşdyrmaga, döwletimiziň dünýä hojalyk gatnaşyklarynyň ulgamyna işjeň goşulyşmagyna, ilatyň ýaşaýyş-durmuş derejesini yzygiderli ýokarlandyrmaga gönükdirilendir.

Hormatly Prezidentimiziň goldawy bilen Arkadag şäherinde  döredilen «Arkadag Medisina Klasteri Menejment» kärhanasy tarapyndan öndürilýän çaga iýmitleriniň, lukmançylyk we arassaçylyk işlerinde ulanylýan serişdeleriň dünýä bazarynda hyrydarlarynyň barha artmagy hem onuň guwandyryjy mysallaryndandyr. Bu kärhananyň önümlerine «Hil menejmentiniň ulgamy» diýen ugur boýunça TDS ISO 9001 güwänamasynyň berilmegi olaryň hiliniň ýokarydygyny tassyklaýar. Milli ykdysadyýetimiziň batly depginler bilen diwersifikasiýa usulynda durnukly ösmegi bolsa  «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda», «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynda» bellenen wezipeleriň netijeli durmuşa geçirilmegine oňyn şertleri döredýär.

Ýurdumyzda söwda we telekeçilik ulgamyny hemmetaraplaýyn ösdürmek, hususy pudagyň milli ykdysadyýetimizde eýeleýän ornuny artdyrmak babatda beýik işleri durmuşa geçirýän  Milli Liderimiziň,  hormatly Prezidentimiziň  janlary sag, ömürleri uzak, il-ýurt, umumadamzat ähmiýetli tagallalary hemişe rowaç bolsun!

                                                                              Saparmyrat OWGANOW,

                                                                 Türkmenistanyň Mejlisiniň deputaty,

                                                         Türkmenistanyň Senagatçylar we telekeçiler  

                                                          partiýasynyň Merkezi geňeşiniň başlygy.

                                                            Çeşme:https://turkmenmetbugat.gov.tm/tk/newspapers/2/articles/191735